ਤਾਜਾ ਖਬਰਾਂ
ਮੱਧ ਪੂਰਬ ਵਿੱਚ ਜਾਰੀ ਭਿਆਨਕ ਜੰਗ ਦਰਮਿਆਨ ਈਰਾਨ ਤੋਂ ਵੱਡੀ ਖ਼ਬਰ ਸਾਹਮਣੇ ਆਈ ਹੈ। ਈਰਾਨ ਦੇ ਮਰਹੂਮ ਸੁਪਰੀਮ ਲੀਡਰ ਆਇਤੁੱਲਾ ਅਲੀ ਖ਼ਾਮੇਨੇਈ ਦੀ ਪਤਨੀ ਮੰਸੂਰੇਹ ਖੋਜਾਸਤੇਹ ਬਾਗਰਜਾਦੇਹ ਵੀ ਦਮ ਤੋੜ ਗਈ ਹੈ। ਸਰਕਾਰੀ ਮੀਡੀਆ ਮੁਤਾਬਕ, ਮੰਸੂਰੇਹ ਹਾਲ ਹੀ ਵਿੱਚ ਹੋਏ ਅਮਰੀਕੀ ਹਵਾਈ ਹਮਲੇ ਦੌਰਾਨ ਗੰਭੀਰ ਰੂਪ ਵਿੱਚ ਜ਼ਖ਼ਮੀ ਹੋ ਗਈ ਸੀ ਅਤੇ ਸੋਮਵਾਰ ਨੂੰ ਹਸਪਤਾਲ ਵਿੱਚ ਇਲਾਜ ਦੌਰਾਨ ਉਸ ਦੀ ਮੌਤ ਹੋ ਗਈ।
ਤਬਾਹ ਹੋਇਆ ਖ਼ਾਮੇਨੇਈ ਦਾ ਪਰਿਵਾਰ
ਸ਼ਨੀਵਾਰ ਤੜਕੇ ਅਮਰੀਕਾ ਅਤੇ ਇਜ਼ਰਾਈਲ ਵੱਲੋਂ ਤਹਿਰਾਨ 'ਤੇ ਕੀਤੇ ਗਏ ਸਾਂਝੇ ਹਮਲੇ ਨੇ ਈਰਾਨ ਦੀ ਸੱਤਾਧਾਰੀ ਲੀਡਰਸ਼ਿਪ ਨੂੰ ਹਿਲਾ ਕੇ ਰੱਖ ਦਿੱਤਾ ਹੈ। ਇਸ ਹਮਲੇ ਵਿੱਚ ਨਾ ਸਿਰਫ਼ 86 ਸਾਲਾ ਖ਼ਾਮੇਨੇਈ, ਸਗੋਂ ਉਨ੍ਹਾਂ ਦੇ ਪਰਿਵਾਰ ਦੇ ਕਈ ਹੋਰ ਜੀਅ ਵੀ ਮਾਰੇ ਗਏ ਹਨ:
ਹਮਲੇ ਵਿੱਚ ਖ਼ਾਮੇਨੇਈ ਦੀ ਧੀ, ਜਵਾਈ ਅਤੇ ਪੋਤੇ ਦੀ ਵੀ ਮੌਤ ਹੋ ਗਈ ਹੈ। ਖ਼ਾਮੇਨੇਈ ਅਤੇ ਮੰਸੂਰੇਹ ਦਾ ਵਿਆਹ 1964 ਵਿੱਚ ਹੋਇਆ ਸੀ। ਮੰਸੂਰੇਹ ਹਮੇਸ਼ਾ ਜਨਤਕ ਜੀਵਨ ਅਤੇ ਸਿਆਸਤ ਤੋਂ ਦੂਰ ਰਹੀ, ਪਰ ਹੁਣ ਇਸ ਜੰਗ ਨੇ ਪੂਰੇ ਪਰਿਵਾਰ ਦਾ ਅੰਤ ਕਰ ਦਿੱਤਾ ਹੈ।
ਈਰਾਨ ਦੀ ਵਾਗਡੋਰ ਹੁਣ 'ਤਿੰਨ ਮੈਂਬਰੀ ਕਮੇਟੀ' ਹੱਥ
ਸੁਪਰੀਮ ਲੀਡਰ ਦੀ ਮੌਤ ਤੋਂ ਬਾਅਦ ਦੇਸ਼ ਵਿੱਚ ਪੈਦਾ ਹੋਏ ਸੰਵਿਧਾਨਕ ਸੰਕਟ ਨੂੰ ਦੇਖਦਿਆਂ, ਈਰਾਨ ਦੀ ਕਮਾਂਡ ਹੁਣ ਇੱਕ ਸ਼ਕਤੀਸ਼ਾਲੀ ਤਿੰਨ ਮੈਂਬਰੀ ਕਮੇਟੀ ਨੂੰ ਸੌਂਪੀ ਗਈ ਹੈ। ਇਸ ਕਮੇਟੀ ਵਿੱਚ ਸ਼ਾਮਲ ਹਨ:
ਮਸੂਦ ਪੇਜ਼ੇਸ਼ਕਿਅਨ (ਰਾਸ਼ਟਰਪਤੀ)
ਗੁਲਾਮ-ਹੁਸੈਨ ਮੋਹਸੇਨੀ ਏਜੇਈ (ਸੁਪਰੀਮ ਕੋਰਟ ਦੇ ਚੀਫ਼ ਜਸਟਿਸ)
ਅਲੀਰੇਜ਼ਾ ਅਰਾਫੀ (ਪ੍ਰਸਿੱਧ ਕਾਨੂੰਨਦਾਨ)
ਫੌਜੀ ਕਮਾਂਡ ਵਿੱਚ ਵੀ ਫੇਰਬਦਲ
ਜੰਗ ਦੇ ਹਾਲਾਤਾਂ ਨੂੰ ਦੇਖਦਿਆਂ ਅਹਿਮਦ ਵਾਹਿਦੀ ਨੂੰ 'ਇਸਲਾਮਿਕ ਰੈਵੋਲਿਊਸ਼ਨਰੀ ਗਾਰਡ ਕੋਰ' (IRGC) ਦਾ ਨਵਾਂ ਕਮਾਂਡਰ ਨਿਯੁਕਤ ਕੀਤਾ ਗਿਆ ਹੈ। ਉਨ੍ਹਾਂ ਨੇ ਮੁਹੰਮਦ ਪਾਕਪੌਰ ਦੀ ਜਗ੍ਹਾ ਲਈ ਹੈ, ਜੋ ਅਮਰੀਕੀ ਹਮਲੇ ਵਿੱਚ ਮਾਰੇ ਗਏ ਸਨ। ਈਰਾਨ ਸਰਕਾਰ ਨੇ ਦੇਸ਼ ਭਰ ਵਿੱਚ 40 ਦਿਨਾਂ ਦੇ ਸਰਕਾਰੀ ਸੋਗ ਦਾ ਐਲਾਨ ਕੀਤਾ ਹੈ।
ਦੂਜੇ ਪਾਸੇ, ਈਰਾਨੀ ਫੌਜ ਨੇ ਵੀ ਬਦਲਾ ਲੈਣ ਦੀ ਕਾਰਵਾਈ ਤੇਜ਼ ਕਰ ਦਿੱਤੀ ਹੈ ਅਤੇ ਵੱਖ-ਵੱਖ ਦੇਸ਼ਾਂ ਵਿੱਚ ਸਥਿਤ ਅਮਰੀਕੀ ਫੌਜੀ ਟਿਕਾਣਿਆਂ ਨੂੰ ਨਿਸ਼ਾਨਾ ਬਣਾਇਆ ਜਾ ਰਿਹਾ ਹੈ। ਵਿਸ਼ਵ ਭਾਈਚਾਰਾ ਇਸ ਵਧਦੇ ਤਣਾਅ ਨੂੰ ਤੀਜੀ ਵਿਸ਼ਵ ਜੰਗ ਦੇ ਸੰਕੇਤ ਵਜੋਂ ਦੇਖ ਰਿਹਾ ਹੈ।
Get all latest content delivered to your email a few times a month.
